काल, 22 सप्टेंबर 2024 रोजी, संपूर्ण जगभरात जागतिक कन्या दिन साजरा करण्यात आला. हा दिवस जगातील मुलींना सन्मान, समान हक्क आणि उज्ज्वल भविष्य देण्यासाठी जागरूकता निर्माण करण्याचा प्रयत्न आहे. जागतिक कन्या दिन आपल्याला मुलींच्या महत्वाकांक्षांना ओळखून, त्यांना योग्य संधी देण्याचा आणि त्यांच्या भविष्याच्या मार्गात येणाऱ्या अडथळ्यांना दूर करण्याचा संदेश देतो.
भारतीय समाजात मुलींनी विविध क्षेत्रात यश मिळवले असले तरी अजूनही अनेक मुलींना शिक्षण, आरोग्यसेवा, आणि मुलभूत हक्कांपासून वंचित राहावे लागते. मुलींच्या शिक्षणाकडे दुर्लक्ष, बालविवाह, लैंगिक भेदभाव, आणि शारीरिक शोषण ही काही गंभीर समस्या आहेत ज्या त्यांच्या विकासाच्या मार्गात अडथळा बनतात. अशा परिस्थितीत जागतिक कन्या दिनाचे महत्व आणखीनच वाढते.
ऋणानुबंध सामाजिक संस्था (RSO) या दिवशी आपल्या सर्व कार्यकर्त्यांसह एकत्र येऊन, मुलींना सशक्त करण्यासाठी नव्या संकल्पांना आकार देते. संस्था नेहमीच गरीब आणि गरजू मुलींना शैक्षणिक मदत, आर्थिक सहाय्य, तसेच कौशल्य विकासासाठी प्रोत्साहन देत असते. “शिक्षण हाच विकासाचा आधार” या तत्त्वावर चालणारी ऋणानुबंध संस्था मुलींना शिक्षणाच्या प्रत्येक पायरीवर पाठिंबा देण्याचा प्रयत्न करत आहे.
जागतिक कन्या दिनाचा संदेश म्हणजे मुलींना त्यांच्या जीवनात स्वातंत्र्य, सन्मान आणि संधी मिळवून देणे, त्यांना त्यांच्या स्वप्नांना गवसणी घालण्यासाठी प्रेरित करणे. प्रत्येक मुलगी आपल्यासाठी देवीचे रूप आहे, आणि तिच्या स्वप्नांना पंख देणे हीच खरी समाजसेवा आहे.
आज, आपण सर्वांनी ठरवूया की जागतिक कन्या दिन फक्त एक दिवस नसावा, तर हा विचार दररोज आपल्या कृतीतून जगवावा. मुलींच्या उज्ज्वल भविष्याच्या दृष्टीने एकत्र येऊन त्यांना आवश्यक ते समर्थन देऊन त्यांची स्वप्नं साकार करू या!